Su vitzeministru de sa cultura de Angola, Cornélio Caley, at fatu un'apellu a totu sos angolanos pro chi pòngiant prus in contu sas limbas natzionales issoro, chi sunt sa base de su connoschimentu de una comunidade e su fatore printzipale chi perpètuat s'istòria de unu pòpulu.
Cornélio Caley at fatu custu apellu durante s'abertura de sa prima cunferèntzia plenària subra de sa "Armonizatzione e agiudu de sas limbas natzionales", amaniada dae su Ministèriu de sa Cultura.
A su chi narat su vitzeministru, b'at galu pagu interessu de sos giòvanos istudentes pro imparare a faeddare una limba natzionale.
"Sos giòvanos istudentes mustrant prus interessu in s'imparòngiu de una limba angena, cando chi diat dèvere èssere su contràriu", at naradu.
"Semus essidos dae pagu tempus dae unu sistema coloniale in ue sas limbas maternas nostras sunt istadas, in casos medas, dispretziadas in manera sistemàtica e impoveridas dae su puntu de vista linguìsticu", at agiuntu Cornélio Caley.
Ammentamus chi in Angola si faeddant unas baranta limbas diferentes. In prus de su portughesu, limba ufitziale, su prus de sa populatzione faeddat limbas bantù, cando chi unos milli abitantes sunt faeddadores de su grupu khoi-san.
cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.